O'zbekiston Professional futbol ligasi Oliy liga uchrashuvlarining ba'zilarini o'tkazilish muddatiga o'zgartirishlar kiritdi. Yaqinlashib kelayotgan 10-turning "Metallurg" - "So'g'diyona" uchrashuvi 16 maydan 18 mayga ko'chirildi. 15-16 may kunlari Bekobod shahridagi stadionda metallurgchilar bayrami o'tkazilishi munosabati bilan ushbu o'zgartirish amalga oshirildi. 

Shuningdek, 12-turning "Paxtakor"-"Mash'al" va "Nasaf"-"Bunyodkor" uchrashuvlari keyinroq muddatga ko'chirilgan. PFL rasmiy saytida ma'lum qilinishicha, ushbu uchrashuvlarning qachon o'tkazilishi ma'lum emas. Xabaringiz bor, 6 iyun kuni O'zbekiston terma jamoasi JCh yo'lida Yaponiyani Toshkentda qabul qiladi. Ushbu o'yinga munosib tayyorgarlik ko'rish maqsadida, terma jamoa asosini tashkil qiluvchi jamoalar - Bunyodkor" va "Paxtakor" klublarining 31 may kuni o'tkazilishi kerak bo'lgan 12-turning yuqoridagi uchrashuvlari qoldirildi. 

23 may kuni o'tkazilishi kerak bo'lgan 11-turning "Bunyodkor"-"Paxtakor" uchrashuvi ham qoldirilishi haqida xabar berib o'tgandik. "Toshkent derbi"sini boshqa muddatga qoldirish haqida har ikkala jamoa o'z roziligini bergan bo'lsa-da, o'yinni ko'chirish haqida rasmiy hujjatga hali imzo chekilmagan. Har holda PFL va O'FF rasmiy saytlarida bu haqda hali rasmiy ma'lumot tarqatilmadi. 

Manba: www.pfl.uz