Yamanning “At Tilol” jamoasiga qarshi o'tajak safar uchrashuvi farg'onaning “Neftchi” jamoasi uchun hal qiluvchi ahamiyatga ega. OFK kubogining guruh bosqichi so'nggi turi o'yinlari Baxraynning “Busaytin” jamoasidan keyin “A” guruhidan nimchorak finalda ishtirok etadigan ikkinchi jamoa nomini aniqlab beradi. 

O'zbekistonning bronza medali sohibini faqat g'alaba qoniqtiradi. Aks holda farg'onaliklar uchun “Busaytin”ni qabul qiladigan Livanning “Al Ahad” jamoasi g'alabasidan umid qilishgina qoladi, xolos. Guruhda ochkolar teng bo'lib qolsa, o'zaro uchrashuvlar natijasiga ko'ra “Neftchi” “Al Ahad”ga imkonyaitni boy beradi. Bu jamoalar o'rtasidagi bahslarda Livanda mezbonlar foydasiga 5:1, Farg'onada ham mezbonlar foydasiga 2:1 hisoblari qayd etilgan.

Nazariy jihatdan Sarkisyan shogirdlari hatto birinchi o'rinni ham qo'lga kiritishlari mumkin. Ammo “Busaytin” bilan ochkolari teng bo'lib qolgan taqdirda ham, farg'onaliklarning to'plar nisbati raqibnikiga solishtirganda anchayin yomon ko'rinishda. O'zaro uchrashuvlari esa 1:1 va 2:2 hisoblari bilan yakunlangan. Bunday holat yuzaga kelishi uchun "Busaytin" o'ta yirik hisobda mag'lubiyatga uchrashi, "Neftchi" esa juda yirik hisobda raqibini engishi lozim. Agar “Neftchi” guruhda ikkinchi o'rinni egallasa, pley-offda “E” guruhida birinchi o'rinni egallagan Suriyaning “Al Majd” jamoasiga qarshi maydonga chiqadi. 

“So'nggi o'yindan oldin tarkibimizda ko'plab yo'qotishlar mavjud. Himoya chizig'ining deyarli barcha vakillari jarohatlanishgan, Sherzod Hakimov esa diskvalifikatsiya qilingan, - dedi jamoani 1988 yildan beri boshqarib kelayotgan Yuriy Vazgenovich Sarkisyan. – Shunga qaramay, men hech qachon jamoaga chet ellik futbolchilarni taklif qilmayman. Men mahalliy futbolchilarni tarbiyalayman, qishloqlardan iqtidorlarni izlab topaman”. 
 
Uning hamkasbi va so'nggi o'yindagi raqibi Sami Naashu uchun yo'qotadigan hech narsa qolmagan: “Neftchi” bilan bo'ladigan o'yin bizga so'nggi o'rindan ko'tarilishimizga imkon bermaydi. Biz borimizni yo'qotib bo'ldik. Faqatgina “At Tilol” ham yaxshi jamoa ekanligini isbotlashga harakat qilamiz”, - dedi bosh murabbiy.