2006 yilgi Jahon chempionati bahslari bo'lib o'tgan Germaniyaga velosipedda sayohat qilgan o'zbekistonlik futbol ishqibozi Akram Ma'rufjonov Janubiy Afrikada o'tkaziladigan navbatdagi mundialga ham qadrdon velosipedida bormoqchi. 59 yoshli Ma'rufjonov bu haqda O'FF matbuot xizmatiga xabar qildi. “2010 yilgi Jahon chempionatiga ham velosipedda borishni niyat qilib qo'ydim”, - deydi Ma'rufjonov. - Afrika juda olis manzilda joylashgan mamlakat. U erga borish uchun bir nechta mamlakatlarning hududidan o'tishga to'g'ri keladi. Demak, o'sha mamlakatlarning vizalari va ruhsatnomalarini olishim kerak. Shuning uchun ham Toshkentga Turkmaniston, Eron, Misr elchixonalariga borib, viza olish maqsadida keldim”. Toshkentga shaxsiy ishlari bilan o'z velosipedida qatnaydigan Ma'rufjonov 2006 yilgi Jahon chempionati bahslarida Germaniya terma jamoasi va Myunxenning “Bavariya” klubi sobiq darvozaboni Oliver Kan bilan uchrashib, unga maxsus sovg'a salomlar topshirgan edi. Futbolchi bilan muntazam aloqada bo'lib turgan Akram Ma'rufjonov hatto Oliver Kanning o'zidan 2008 yilgi xayrlashuv uchrashuviga taklifnoma ham olgan. “Kan bilan 1 sentyabr kuni uchrashdik”-, deya eslaydi Ma'rufjonov. - Aniqrog'i, bizning qidirayotganimizdan xabar topib, futbolchining o'zi, ya'ni uning yordamchilari, ma'muriyat hodimlari bizni izlab topishdi. Biz sovg'a salomlarni unga ko'rsatdik. Kanga uning nomi yozilgan zarbop to'n kiydirdik. Milliy kulolchilik yo'lida yasalgan va Oliver Kanning 2002 yilgi Jahon chempionatida eng yaxshi futbolchi deb tan olingan vaqtda tushgan holati tasvirlangan nodir ko'zacha va lagan berdik. Milliy libosimiz yaktakni ham unutmadim”, - deydi Ma'rufjonov. Marg'ilonlik sayohatchi-ishqiboz, shuningdek, ko'rsatilayotgan yordam uchun O'zbekiston Futbol Federatsiyasiga ham o'z minnatdorchiligini bildirdi. “Avvalo, e'tibor va mehmondo'stlik uchun tashakkur. Har safar Toshkentga kelganda shu erga kirib o'taman. Taassurotlarni kimgadir aytmasang, maza qilmaysan inson. Shu erda suhbatlashib, ko'rgan bilganlarimni aytib beraman. Federatsiya Janubiy Afrika Respublikasiga viza olishimga ko'mak berishini juda-juda istardim. Bu ish Federatsiyaning yordami bilan oson bitishiga shubham yo'q. JAR vizasi urilgan pasport bilan Jahon chempionati bo'lib o'tadigan shahargacha bo'lgan hududlardan o'tish oson bo'lardi”, -deydi u. Akram Ma'rufjonov bilan uyushtirilgan intervyuni tez orada kuni www.the-uff.com da to'liqligicha o'qishingiz mumkin. 

O'FF matbuot xizmati