Oliy liga jamoalari o'rtasida O'zbekiston chempionati bahslarining 10-turida yon chiziq hakamlari ko'plab qo'pol xatolarga yo'l qo'yishdi. Ushbu tur doirasida o'tkazilgan “Paxtakor”-“Neftchi” hamda “Lokomotiv”-“Olmaliq” uchrashuvlarida urilgan ayrim gollarda yon chiziq hakamlarining xatosi katta ekanligi Toshkentda “A” sertifikati uchun o'tkaziladigan murabbiylarning o'quv va malaka oshirish kurslarida muhokama markazida bo'ldi. “Paxtakor”ning “Neftchi”ga qarshi uchrashuvida kiritilgan 3-golda yon chiziq hakami Vladlen Lushinning xatosi o'yinda yirik hisobning qayd etilishiga olib keldi, - deydi Hakamlar va nazoratchilar qo'mitasi raisi Rustam Akramov. - Lushin o'yindan tashqari holatda kiritilgan golni inobatga olib, poytaxtliklar foydasiga qaror qabul qilgan”. Mazkur uchrashuvning ertasiga bo'lib o'tgan “Lokomotiv”-“Olmaliq” uchrashuvida esa, deyarli huddi shunday holatda yon chiziq hakami Ravil Shoyaxmetov mehmonlar foydasiga qaror qabul qilgan. Ikkala hakam ham o'yin qaydnomalarida keltirilganidek, 8 balldan yuqori baho olishgan. “Negadir, so'nggi vaqtlarda yon chiziq hakamlarimiz orasida o'yindan tashqari holatlarda urilgan gollarda xato qilish tendentsiyasi kuchayib bormoqda. Bunga ishqibozlarimiz ham salbiy munosabatda bo'layaptilar. Ularni to'g'ri tushunaman. Chunki, bu kabi xatolar futbolning jozibasini o'ldiradi. Bir turda shunday xatoning qayd etilishi bizni tashvishga solayapti. Masalaga e'tiborsizlik bilan yondashish noto'g'ri. Avvalo, bosh murabbiylar norozi bo'lishadi. Undan tashqari, hakamlarning obro'si ham keskin tushib ketadi. Qolaversa, yon chiziq hakamlarining ham xatolari jazolanmagani etmagandek, yaxshi baho olishga halaqit bermaydi deb o'ylay boshlaydilar”, - deydi Rustam Akramov. Toshkentdagi murabbiylar kursiga rahbarlik qilayotgan professor Akramov, shuningdek, hakamlar o'yindan tashqari holatlarni qayd etishda biroz pauza qilishlari, soniyalar bo'lsa ham o'ylab ko'rishlar lozimligini uqtirib o'tdi. “Xatolarda himoyalanganmasmiz. Hammamiz ham xato qilamiz. Ammo, uni takrorlamaslik kerak. Ayniqsa, undan kimdir jabr ko'radigan bo'lsa, bu yomon oqibatlarga olib keladi”, - deya ta'kidladi Rustam Akramov. Murabbiylar kurslarida hakamlik saviyasi, faoliyati haqida ma'ruza o'qiyotgan FIFA referisi Valentin Kovalenko ham ushbu masala haqida fikr bildirar ekan, bittagina saviyasiz hakam ko'p sonli tajribali hakamlar to'plagan nufuzga sanoqli daqiqalar ichida putur etkazishini aytib o'tdi. “Saviyasiz hakamlikka futbolning ushbu bo'g'inini nazorat qiladigan organlar tomonidan nazorat borligini, ular jazosiz qolmasligini, eng avvalo, ishqibozlar, jurnalistlar, futbol jamoatchiligi bilsin. Xato o'z vaqtida va joyida to'g'rilanishi maqsadga muvofiqdir”, - deydi Kovalenko. FIFA referisining fikrini Akramov to'ldirishga harakat qilar ekan, bu kabi xatolarning qayd etilishi Hakamlar va nazoratchilar qo'mitasi, qolaversa, Federatsiyaning hakamlik masalalari bilan shug'ullanuvchi boshqarmasi faoliyatida kamchiliklar borligidan darak ekanligiga ishora qildi. O'zbekiston Futbol Federatsiyasining Hakamlar va nazoratchilar qo'mitasi 20 may kuni navbatdagi majlisini o'tkazadi. Unda 10-turdagi hakamlik darajasi muhokama qilinib, yuqoridagi holatlar yuzasidan sirdaryolik Lushin va poytaxtlik Shoyaxmetovlarga tegishli choralar qo'llanadi. “Biz tahliliy komissiyaga ushbu hakamlarning bahosini pasaytirishni tavsiya qilamiz. Bu qarorni esa, qo'mita majlisi o'tkazilganligi haqidagi protokol bilan rasman tasdiqlaymiz”, - deydi Rustam Akramov. Eslatib o'tamiz, “Paxtakor”-“Neftchi” uchrashuvida xizmat qilgan Lushin 8,2 hamda “Lokomotiv”-“Olmaliq” bahsining yon chiziq hakami Shoyaxmetov 8,4 baho olgandi. Ularning har ikkisi ham 20 may kuni soat 12:00 da bo'lib o'tadigan yig'ilishga taklif etiladilar.
|
